Almaniya “Şimal axını” qaz kəmərinin bərpası imkanlarını nəzərdən keçirmir. Bunu çərşənbə axşamı, aprelin 1-də Kiyevdə keçirilən mətbuat konfransında Almaniyanın xarici işlər naziri vəzifəsini icra edən Annalena Berbok deyib. “Bu qaz kəməri bərpa oluna bilməz və bu qərar yalnız Almaniyadan asılıdır”, – Berbok vurğulayıb.
Almaniya XİN-in rəhbəri əmin edib ki, Almaniyanın siyasi partiyaları bu məsələdə konsensusa gəliblər, mediada yayılan spekulyasiyalar isə reallığa uyğun gəlmir. O əlavə edib ki, “Şimal axını 2” ilə bağlı qərar Almaniyaya baha başa gələn strateji səhvdir. Hələ 2022-ci ildən əvvəl Ukrayna, Baltikyanı ölkələr və Polşa qaz kəmərinin riskləri barədə xəbərdarlıq etmişdilər, lakin Almaniya bundan sonra “vəziyyətə başqa cür baxdı”. Nəticədə ölkə Rusiyanın enerji resurslarından asılı vəziyyətə düşdü, sonra isə Kreml qazdan Avropaya təzyiq vasitəsi kimi istifadə edib.
Berbok təsdiq edib ki, enerji təhlükəsizliklə sıx bağlıdır və Rusiyanın kölgə neft donanmasına qarşı sanksiyalar müharibə üçün maliyyəni məhdudlaşdırmağa kömək edir. Bundan əvvəl Almaniyanın iqtisadi işlər və energetika naziri Robert Habek Almaniyanın “Şimal axını” qaz kəmərlərinin bərpası imkanlarını nəzərdən keçirmədiyini təsdiqləyib.
Bundan əvvəl məlum olub ki, ABŞ amerikalı investorların dəstəyi ilə Rusiyanın Avropaya “Şimal axını 2” qaz kəmərinin yenidən işə salınması layihəsini hazırlayır.
Lakin qısa müddət sonra, Almaniya hakimiyyətinin ABŞ və Rusiya arasında onun amerikalı investorlara satılması ilə bağlı məxfi danışıqları barədə məlumatların ardınca “Şimal axını 2” qaz kəmərinin yenidən işə salınmasının qarşısını almaq variantlarını nəzərdən keçirdiyi barədə məlumatlar ortaya çıxıb.
Xatırladaq ki, 2023-cü ilin sentyabrında təxribat nəticəsində iki “Şimal axını 2” boru kəmərindən biri partladılmışdı. İldə 27,5 milyard kubmetr qaz ötürmə qabiliyyətinə malik olan digər qaz kəməri “Şimal axını 2” zədələnməsə də, heç istifadə olunmayıb. 2025-ci il yanvarın sonunda Danimarka Qazprom-un törəmə şirkətinə Baltik dənizində “Şimal axını 2” qaz kəmərinin qorunub saxlanması üçün iş aparmağa icazə verib.
V.VƏLİYEV
