“Almaniya Prezidentinin Qafqaza səfəri ərəfəsində onun sosial şəbəkə hesabından edilən paylaşım təbii ki, Azərbaycan tərəfindən ciddi narazılıqla qarşılandı”. Bu sözləri SİA-ya açıqlamasında politoloq Oqtay Qasımov deyib.
O bildirib ki, burada mövcud olmayan keçmiş qondarma xunta rejiminin əski parçasının fotosunun yayılması Azərbaycanın ciddi şəkildə narazılığına səbəb oldu: “Bununla bağlı Almaniya səfiri Xarici İşlər Nazirliyinə çağırılaraq ondan üzrxahlıq etməsi tələb olundu. Onu qeyd etmək lazımdır ki, Almaniya kimi böyük bir dövlətin rəhbərinin ofisinin bu məsələ ilə bağlı davranışı qəbuledilməzdir. Ən azı o baxımdan ki, texniki hansısa səbəb sayıla bilməz. Hansısa yalnışlıq ola bilməz. İlk növbədə o baxımdan ki, Almaniyanın hazırkı prezidenti keçmiş xarici işlər naziridir və təcrübəli diplomatdır. Onun ofisindəki şəxslər də bu tipli məsələləri kifayət qədər yaxşı bilirlər. Sadəcə hesab edirəm ki, bu, həm də nəbz yoxlaması sayıla bilərdi. Çünki buna Azərbaycanın necə reaksiya verəcəyi də onlar üçün maraqlı idi.
Güman ki, Almaniya prezidentinin ofisində də erməni lobbisi ilə əlaqədar olan, onların maraqlarını müdafiə edən şəxslər də var. Buraya nəzərə alsaq ki, həm də Fransanın müəyyən təsiri ola bilər. Bu da istisna deyil. Amma bütün bunlara baxmayaraq Azərbaycanın sərt reaksiyası Almaniya tərəfini geri çəkilməyə vadar etdi. Almaniya prezidentinin Administrasiya rəhbərinin üzrxahlıq məktubu müsbət qarşılanmalıdır. Bu, həm Almaniyanın Azərbaycana verdiyi önəmdir, o cümlədən səhvini qısa müddətdə düzəltməsi müsbət hal sayıla bilər. Əslində bu addımın atılması da bugünkü görüşdə müəyyən gərginliyi ortadan qaldırdı.
Almaniya son dövrlərdə görürük ki, Cənubi Qafqazda fəal rol oynamağa çalışır. Cənubi Qafqazda fəal rol oynamaq üçün Cənubi Qafqazdakı reallıqlara uyğun siyasət yürüdülməlidir. Cənubi Qafqazın lider ölkəsi olan Azərbaycanın maraqları gözardı edilməməlidir. Almaniya hesab edirəm ki, bu yalnışdan bir nəticə çıxardı və Azərbaycanla münasibətlər bundan sonrakı dövrdə konstruktiv məcrada davam edə bilər”.
