“Təəssüflər olsun ki, Almaniya prezidenti tərəfindən təxribat xarakterli və həqiqəti əks etdirməyən paylaşım sosial mediada yayıldı”. Bunu SİA-ya açıqlamasında Milli Məclisin deputatı Naqif Həmzəyev deyib.
O bildirib ki, Azərbaycan tərəfi buna sərt etirazını bildirdi: “Almaniyanın səfiri ilə sərt danışıldı və üzrxahlıq edilməyəcəyi təqdirdə Almaniya prezidentinin Azərbaycana səfərinin məqsədə müvafiq olmadığı həmin tərəfə çatdırıldı. Ancaq mövcud problemi anındaca həll edərək üzrxahlıq məktubu Azərbaycan tərəfinə ünvanlandı. Hətta razılaşdırıldı ki, bu məktub media vasitəsilə də yayımlansın və bununla da bu problem öz həllini tapdı və hal-hazırda Almaniya Fedarativ Respublikasının prezidenti Azərbaycanda rəsmi səfərdədir. Bu artıq onu göstərir ki, Azərbaycan öz suverenliyini bərpa edib. Hətta Ermənistan siyasi rəhbərliyi belə Azərbaycan suverenliyini sözdə qəbul edir və Qarabağ məsələsində artıq onlar Qarabağ hərakatının davam etdirilməsinin mənasız olduğunu dilə gətirsələrdə hələ də məhz bu məsələlər üzərindən təxribatyönümlü hadisələr baş verir və baş verməsi üçün də çalışan qüvvələr, şəxslər var. Əsas məqam ondan ibarətdir ki, bu cür baş verən problemləri Azərbaycan tərəfi anında həll edə bilir. Hətta problemin müsbət həllinə dair qarşı tərəfdən üzrxahlıq mesajını və niyyətini də görə bilirik. Bu artıq Azərbaycan dövlətinin gücünü göstərir. Həmçinin Azərbaycanın həyata keçirdiyi uğurlu xarici siyasətin öz bəhrəsini verməsinə bariz bir nümunədir. Mən inanıram ki, zamanla bu cür təxribatların artıq baş vermək ehtimalları azalacaqdır. Çünki hələ də erməni lobisindən bəhrələnən və təsiri altında olan siyasi qüvvələr, siyasətçilər var. Düşünürəm ki, bunlar da növbəli şəkildə sıradan çıxacaqlar. Bu cür vasitələrlə Azərbaycanın siyasətinə xələl gətirə bilməzlər. Xüsusilə də böyük dövlətlər Azərbaycanla əlaqə qurmaqda maraqlıdırlar”.
