Elnarə Akimova
Milli Məclisin deputatı, YAP idarə Heyətinin üzvü, filologiya elmləri doktoru
Azərbaycan Respublikasının Prezidenti İlham Əliyevin Almaniya Federativ Respublikasının Prezidenti Frank-Valter Ştaynmayerin aprelin 2-də Azərbaycana səfəri zamanı mətbuata verdiyi bəyanat Azərbaycan-Almaniya münasibətlərində qurulan yeni körpünün başlanğıcı kimi qəbul edilməlidir. İlham Əliyev Azərbaycan-Almaniya münasibətlərinin yeni inkişaf dövriyyəsinə qədəm qoyduğunu bildirərək bu münasibətin iqtisadi, siyasi, humanitar tərəflərinə diqqət yönəltmişdir. Görüş zamanı Prezident İlham Əliyev bir çox mühüm beynəlxalq məsələlərlə bağlı Almaniya Prezidenti ilə fikir mübadiləsi aparmış, Azərbaycanın COP29 beynəlxalq iqlim konfransına ev sahibliyi etməsi, Amerika-Avropa İttifaqı gərginliyi, Rusiya-Qərb gərginliyi kimi aktual məqamlara toxunmuşdur. Həmçinin görüş zamanı ölkə başçısı yenidən ciddi mesajlar vermişdir.
Ermənistanın sülh müqaviləsinin imzalaması ilə bağlı Azərbaycan tərəfindən müəyyən şərtlər irəli sürüldüyünü bildirən İlham Əliyev bununla həm Qarabağla bağlı Ermənistanın ərazi iddialarından əl çəkməli olmasının zəruriliyi məsələsini aktuallandırdı, həm də beynəlxlaq təşkilatların bu məsələdə heç nəyə yaramadığını bir daha gündəmə gətirdi. Qarabağ məsələsində Prezident İlham Əliyevin səsləndirdiyi fikirlər ölkəmizin imza atdığı qələbənin izharını çatdırmaqla yanaşı, Azərbaycanın bu münaqişəni və beynəlxalq hüququ döyüş meydanında və siyasi müstəvidə həll etməsi ilə bağlı gerçəkliyin ifadəsidir. “Azərbaycan 30 il ərzində erməni işğalından əziyyət çəkmişdir”. Bu sözləri Azərbaycan Respublikasının Prezidenti İlham Əliyev Almaniya Federativ Respublikasının Prezidenti Frank-ValterŞtaynmayerin Azərbaycana səfəri zamanı mətbuata verdiyi bəyanatda bir daha vurğuladı. Prezident bildirdi ki, bizim xalqımız etnik təmizləməyə məruz qalıb: “Bir milyon azərbaycanlı erməni aqressiyasına görə evsiz-eşiksiz qalmışdır və torpaqlarımızın təxminən 20 faizi işğal altına düşmüşdür. Əfsuslar olsun ki, beynəlxalq təşkilatlar bu məsələ ilə bağlı ciddi addım atmamışlar. Azərbaycan bu münaqişəni və beynəlxalq hüququ özü döyüş meydanında və siyasi müstəvidə həll etmişdir. Məhz bu tarixi Zəfərimiz sülh danışıqlarına yol açmışdır. Hesab edirəm ki, bu gün Azərbaycanın və Ermənistanın sülhün əldə edilməsində mövqeləri bir-birinə kifayət qədər yaxınlaşmışdır”.
Beləliklə, dövlətimizin başçısı bir daha Ermənistanın 30 il ərzində torpaqlarımızı işğal altında saxladığını və xalqımıza qarşı etnik təmizləmə apardığını beynəlxalq ictimaiyyətin diqqətinə çatdırıb. Aydındır ki, Ermənistanın silahlı qüvvələrinin qeyd-şərtsiz işğal etdiyi torpaqlarımızdan çıxarılması ilə bağlı BMT qətnamələri olsa da, icra mexanizmi olmayıb. Beynəlxalq təşkilatlar və ölkələr Ermənistanın işğalına göz yumublar. Nəticədə isə Azərbaycan Ordusu beynəlxalq ədaləti və hüquqi öz gücünə bərpa etdi. Bu müddət ərzində müəyyən beynəlxalq təşkilatlar Azərbaycanın haqq mübarizəsinə və torpaqlarının işğal altında qalmasına hüquqi-siyasi qiymət verməli idi. Ən azından hər şeyi hüquqi müstəvidə həll etdiyini vurğulayan Avropadan bunu gözləməyə haqqımız var idi. Hətta atəşkəsdən sonra bu münasibəti onlardan gözləyirdik. Lakin beynəlxalq təşkilatlar bu məsələyə ikili standartlardan yanaşdılar və Ermənistana havadarlıq etmək yolunu tutdular. Onlar xalqımıza qarşı olunan soyqırımı, terror hadisələrini, mülki əhali və körpələrin hədəfə alınmasını, eləcə də haqlı mübarizəmizi görməzdən gəldilər. Bu faktların heç birinə hüquqi və ya siyasi istiqamətdə qiymət verilmədi. Lakin 44 günlük Vətən müharibəsində qələbə qazanaraq tarixi və ilahi ədaləti bərpa etdik. Biz öz mübarizəmizlə, xalqımızın, hakimiyyətimizin qətiyyəti və birliyi ilə Zəfərə nail olduq. Hətta bugünlərdə 9-cu ildönümü olan Aprel döyüşləri də Zəfərimiz üçün zəmin oldu. Ən böyük gücümüzün elə özümüz olduğunu dünyaya göstərdik. 30 il ərzində münaqişənin sülh yolu ilə həll olunmasını gözlədik.
Təəssüf ki, erməni lobbisi və havadarları sülhə mane olaraq, işğalla barışmağımızı istədilər. Onlar torpaqlarımızın işğal altında olmasına və minlərlə soydaşımızın qaçqın düşməsinə qiymət verməkdən çəkindilər. Ona görə də cənab Prezident İlham Əliyev hər zaman bu məsələləri xüsusi vurğulayaraq, reallıqları dünyanın diqqətinə çatdırır.
Ölkə başçısının qeyd etdiyi kimi, ikitərəfli münasibətlərin tarixində bu, Almaniya Prezidentinin Azərbaycana birinci rəsmi səfəridir. Əlbəttə ki, bu səfərin çox müsbət nəticələri olacaq, iki ölkə arasında daha uğurlu işlərə imza atılacaq, münasibətləri və dostluqları daha da gücləndirəcəkdir. Ermənilər, onlara havadarlıq edən beynəlxalq təşkilatlar isə İlham Əliyevin mesajlarına ciddi yanaşmalı, öz üzərlərinə düşən missiyanı gerçəkləşdirmək üçün tələsməlidirlər.
