İstanbul Universitetinin Türkiyyat Araşdırmaları İnstitutunda “Novruz adətləri” mövzusunda konfrans və konsert proqramı keçirilib. SİA xəbər verir ki, tədbir İstanbulda fəaliyyət göstərən Türk Dünyası Araşdırmaları Vəqfi tərəfindən təşkil edilib.
Mərasimdə iştirakçılara “TRT Türkü” radiosunda yayımlanan “Azərbaycan ruzigarı” proqramının müəllifi və aparıcısı Səidə Ömər tərəfindən Novruz bayramı ilə bağlı adətlərimiz və bu ənənələri əks etdirən filmlərdən fraqmentlər toplusu təqdim olunub.
Azərbaycanın görkəmli şairi Məhəmmədhüseyn Şəhriyarın “Heydərbabaya salam” poemasından Novruz bayramı ilə bağlı bölümü səsləndirən Səidə Ömər çıxışında Qarabağ Zəfəri haqqında danışaraq artıq bir neçə ildir Novruz bayramının Şuşada qeyd edilməsinin sadəcə Azərbaycanın deyil, bütün Türk dünyasının qələbəsi olduğunu deyib.
Proqram çərçivəsində qonaqlar Novruz adətlərinə uyğun olaraq yumurta döyüşdürüb, bayram şamları yandırıblar. İştirakçılara Azərbaycanın Novruz şirniyyatları təqdim edilib.
Tədbir Türkiyədəki səfirliyimizin nəzdindəki Azərbaycan Mədəniyyət Mərkəzinin “Azərbaycan ruzigarı” qrupunun konsert proqramından ibarət bədii hissə ilə davam edib.
Konsertdə qiraətçi Səidə Ömər Azərbaycan ədəbiyyatından Novruz və vətənpərvərlik mövzusunda şerlər səsləndirib, qrupun bədii rəhbəri və tarzəni Pərviz Musayev ilə kamança ustası Ruzbeh Moqaddamın ifasında Azərbaycan muğamları, xalq və bəstəkar mahnıları dinlənilib.
Sonda qrup üzvlərinə vəqfin sədri Közhan Yazgan tərəfindən təşəkkürnamə və kitab təqdim edilib.
