…İyulun 1-dən Rusiyada kommunal xidmətlər orta hesabla 11,9 faiz bahalaşacaq.
SİA rus saytlarına istinadən xəbər verir ki, bu barədə Dövlət Dumasının Tikinti və Mənzil-Kommunal Təsərrüfat Komitəsinin sədr müavini Aleksandr Aksenenko məlumat verib.
Onun sözlərinə görə, Rusiya hökuməti 2025-ci il, eləcə də 2026-2027-ci illərin planlaşdırma dövrü üçün mənzil-kommunal xidmətlərin tariflərinin indeksasiya səviyyəsini əvvəlcədən müəyyən edib.
Qiymət artımı ötən il olduğu kimi, qaz, işıq, su və istilik təchizatına təsir edəcək. Nəticədə kommunal ödənişlərdə ümumi məbləğ orta hesabla 11,9 faiz artacaq.
RİA Novosti ilə söhbətində deputat qeyd edib ki, tariflərlə bağlı vəziyyət müxtəlif regionlarda fərqli olacaq. Üstəlik, xidmətlərin qiyməti hətta bir regionda da dəyişə bilər; məsələn, kənd yerlərində qiymətlər şəhərdən aşağı olacaq. Orta dəyərdən maksimum kənarlaşmalar da hökumət tərəfindən təsdiq edilir.
Novosibirsk vilayətində, məsələn, 11,9 faiz tarif artımı 4,8 faiz məqbul sapma ilə müəyyən edilmişdir. Bu o deməkdir ki, bəzi yerlərdə artım 15 faizə, digərlərində isə 11,9 faizdən az ola bilər.
Aksenenko vurğulayıb ki, tariflərin artırılmasının əsas səbəblərindən biri kommunal infrastrukturun korlanmasıdır, Tikinti Nazirliyinin məlumatına görə, bu, regiondan asılı olaraq 40-80 faiz arasında dəyişir, həmçinin inflyasiyanın səviyyəsindən asılıdır.
Dövlət Dumasının Tikinti və Mənzil-Kommunal Təsərrüfat Komitəsi tarif artımını cilovlamaq üçün həll yolları axtarır. Mühüm addım kommunal şəbəkələrin müasirləşdirilməsidir. Aksenenkonun fikrincə, bütün ölkə üzrə vahid yanaşma tətbiq etməkdənsə, inventarlaşdırma aparmaq və istehlak standartlarını hər bir regionda real vəziyyəti nəzərə almaqla tənzimləmək lazımdır.
Mənzil-kommunal xidmətlər üzrə ödənişlərin şəffaflığının təmin edilməsi də vacibdir. Bundan əvvəl yazılmışdı ki, mayın 5-dən kommunal xidmətlərin yenilənmiş ödəniş sistemi tətbiq olunacaq. O da bildirilib ki, kommunal xidmətlərin qiymətinin 30 faizə qədər artırılması ehtimalı var.
Əli Babayev
