“İRƏLİ” İctimai Birliyinin təşkilatçılığı, Elm və Təhsil Nazirliyinin dəstəyi və Lənkəran Dövlət Peşə Təhsil Mərkəzinin tərəfdaşlığı ilə “Gənclərin peşə bələdçisi” layihəsi çərçivəsində düşərgə mərhələsinə start verilib.
SİA xəbər verir ki, birliyin mətbuat xidmətindən verilən məlumata görə layihə gəncləri effektiv şəkildə peşə təhsilinə cəlb etmək, onların motivasiyasını artırmaq, bacarıqları və əmək bazarı ehtiyacları arasında körpü yaratmaq üçün “gənclərin peşə bələdçilərini” formalaşdırmağı hədəfləyir.
Lənkəranda keçirilən dördgünlük düşərgə çərçivəsində iştirakçılar üçün bir sıra praktiki və nəzəri təlimlər keçirilir. Təlimlərdə əmək bazarının tələbləri, peşə seçiminin əhəmiyyəti, karyera planlaşdırılması və müasir peşə imkanları barədə ətraflı məlumatlar təqdim olunur.
Layihənin innovativ sessiyalarından biri olan “Peşə kitabxanası” metodu vasitəsilə şagird və valideynlərin peşə sahibləri ilə birbaşa görüşləri təşkil olunacaq. Bu görüşlər zamanı iştirakçılar real təcrübələr əsasında peşələr haqqında daha dolğun və obyektiv təsəvvür formalaşdıra biləcəklər. Eyni zamanda, iştirakçılar regionda fəaliyyət göstərən peşə müəssisələrinə gedərək praktiki mühitlə yerində tanış olacaqlar.
Qeyd edək ki, layihə mərhələli şəkildə həyata keçirilir və düşərgədən əvvəl “Əmək bazarının analizi, gələcəyin peşə və bacarqıları”, “Peşə təhsili iqtisadiyyatı və sənaye müəssisələrində peşə işçiləri”, “Peşə bələdçisi üçün ünsiyyət bacarığı” mövzularında onlayn təlimlər baş tutub.
Təlimlər proqramı başa çatdıqdan sonra iştirakçılar paytaxt və bölgələrə göndəriləcək və burada təhsilini davam etdirə bilməyən qızlarla, məktəblilərlə və digər gənclərlə, eyni zamanda, valideynlərlə birbaşa görüşlər keçirəcəklər. Bu görüşlərdə ilkin məlumat sessiyaları ilə yanaşı, fərdi diaqnostika, bacarıq kəşfi və peşə yönləndirmə sessiyaları təşkil ediləcək.
Layihə çərçivəsində iştirakçılar bölgələrdəki gənclərlə qurulan əlaqələr vasitəsilə peşə təhsilinin əhəmiyyəti barədə məlumatlandırma prosesini davam etdirəcək, bəzən də onlayn sessiyalar keçirəcəklər.
Nəhayət, layihəyə cəlb olunmuş tərəfdaşların vasitəsilə maarifləndirmə prosesi, eləcə də peşə təhsili marağında olan gənclərin dəstəklənməsi davam edəcək.
