.jpg)
“Hal-hazırda əmlak bazarında ciddi və nəzərəçarpan dinamik dəyişikliklər müşahidə olunmur. Qiymətlər əsasən sabitdir və bazarda böyük dalğalanmalar yoxdur. Bu vəziyyətin əsas səbəblərindən biri mövcud yay mövsümüdür ki, adətən bu dövrdə əmlak bazarında tələbat və fəaliyyət müəyyən qədər azalır”. Bu sözləri SİA-ya açıqlamasında əmlak məsələləri üzrə ekspert Ramil Osmanlı deyib.
Onun sözlərinə görə, bazarda əhəmiyyətli bir dəyişiklik yaşanmaması həm alıcıların, həm də satıcıların fəaliyyətdə ehtiyatlı olmalarından qaynaqlanır: “Ümumiyyətlə, bazarda stabilliyin qorunması, həmçinin yaxın gələcəkdə ciddi inzibati qərarların qəbul olunmaması ilə bağlıdır. Həmçinin dünya səviyyəsində makroiqtisadi səviyyədə mühüm proseslər baş verməzsə, məsələn, qlobal iqtisadiyyatda böyük sarsıntılar və ya maliyyə böhranları kimi, bu sabitliyin davam etməsi gözlənilir. Bu isə bazarın mövsümün sonuna qədər eyni vəziyyətdə qalmasına səbəb olacaq. Ancaq, sentyabr ayından etibarən əmlak bazarında müəyyən dəyişikliklərin meydana gəlməsi ehtimalı vardır. Bu, payız mövsümünün başlanğıcı ilə əlaqədar aktivliyin artması və iqtisadi şərtlərin dəyişməsi nəticəsində baş verə bilər. Bazarda təklif və tələbin artması və ya azalma meylləri müşahidə olunarsa, bu qiymətlərə və ümumi bazar vəziyyətinə təsir edə bilər. Ona görə də, sentyabr ayından sonra bazarın gedişatı diqqətlə izlənməlidir ki, mümkün dəyişikliklər vaxtında qiymətləndirilsin və uyğun tədbirlər görülə bilsin. Nəticə olaraq, hazırda əmlak bazarında stabillik hökm sürür və bu vəziyyət yaxın perspektivdə, xüsusən yay mövsümündə davam edəcək. Lakin payızın başlanğıcı ilə birlikdə bazarda müəyyən canlanma və dəyişikliklərin baş verməsi ehtimalı nəzərə alınmalıdır”.
