.jpg)
“Əslində, bu mümkün deyil. Bu cür düşüncə -“övladımdan imtina edim ki, qohum nikaha icazə verilsin” – çox bəsit və məntiqsiz yanaşmadır. Birincisi, hüquqi baxımdan valideynin övladdan imtinası mümkün deyil. İkincisi, belə bir addım atılsa belə, bu vəziyyətə çıxış yolu kimi istifadə olunması real deyil”. Bu sözləri SİA-ya açıqlamasında sosioloq Lalə Mehralı deyib.
Onun sözlərinə görə, bu məsələdə artıq sistem elektronlaşdırılıb. Bütün soy-kökümüz, yəni soyağacımız dövlətin elektron platformasında əks olunub. Qohum nikahlar da yalnız bir halda qadağan edilir: əgər iki şəxs eyni nənə və babanın nəvələridirsə: “Yəni, onlar eyni adamı nənə-baba kimi tanıyırlarsa, onların evlənməsi qanunla qadağandır. Bu da elektron sistemdə açıq şəkildə görünür və avtomatik olaraq nikah qeydə alınmır. Belə fırıldaq yollarla – məsələn, övladdan imtina etməklə – bu sistemin yanından keçmək mümkün deyil. Hətta bəzi insanlar düşünürlər ki, başqa ölkəyə gedib orada evlənsinlər. Amma bu da çıxış yolu deyil. Əgər həmin ölkənin vətəndaşı deyilsə, nikah yalnız konsulluğun, səfirliyin vasitəsilə rəsmiləşdirilə bilər. O zaman da səfirlik Azərbaycanın aidiyyəti orqanlarına sorğu göndərir və qohumluq əlaqəsi aşkarlanarsa, nikah qeydə alınmır. Bu məsələ hüquqi baxımdan hərtərəfli tənzimlənib və dövlət tərəfindən çox effektiv işlənib.
Əgər bu cür yolları düşünmək əvəzinə, sadəcə bir dəfə internetdə tibbi resurslara, elmi məqalələrə və ya süni intellektə belə bir sual versələr – “Qohum nikahları hansı nəticələrə səbəb olur?” – cavabdan şok olacaqlar.
Əgər bu cavabı oxuyandan sonra belə valideynlər yenə də övladlarını qohumla evləndirmək istəyirlərsə, artıq onların valideynlik məsuliyyətini ciddi sual altına almaq lazımdır.
Çünki qohum nikahları nəticəsində doğulan uşaqlarda genetik xəstəliklər riski artır, həm valideynlər, həm də gələcək nəslin çəkəcəyi fiziki və mənəvi iztirablar böyük olur. Bunu heç bir məsuliyyətli valideyn övladına rəva görə bilməz”.
