Danimarka Milli Bankının rəhbəri Kristian Kettel Tomsen gözlənilmədən ölkəni avronu qəbul etməyi düşünməyə çağırıb.
SİA xarici qaynaqlara istinadən xəbər verir ki, Bloomberg-ə müsahibəsində o, bunu iqtisadi amillərlə deyil, Danimarkanın artan beynəlxalq qeyri-sabitlik şəraitində Avropa İttifaqında daha əhəmiyyətli rol oynamaq və təhlükəsizliyini gücləndirmək istəyi ilə əlaqələndirib.
Bu çağırış Avropa İttifaqı və ABŞ arasında Danimarka şirkətlərinə birbaşa təsir edən ticarət münaqişələri fonunda səslənir.
Xüsusilə, Tramp administrasiyası bu yaxınlarda Danimarkanın Orsted şirkətinin 1,5 milyard dollarlıq layihəsini dayandırıb, daha əvvəl isə Avropa İttifaqından gələn mallara 15 faiz rüsum tətbiq edib.
Danimarka formal olaraq avrozonanın bir hissəsi olmasa da, onun kronu avroya möhkəm bağlanıb və bu, onun pul siyasətini Avropa Mərkəzi Bankından asılı edir.
Tomsen etiraf edir ki, Danimarka artıq makroiqtisadi mənada “avro ölkəsi”dir, lakin avrozonanın bir hissəsi olmaması onu valyuta bloku daxilində qərarlara təsir etmək imkanından məhrum edir.
Onun fikrincə, avroya keçid Danimarkaya “qərarların qəbulunda daha çox rol oynamağa” və regional əməkdaşlığa “daha sıx inteqrasiya” etməyə imkan verəcək.
Tomsen avronu Danimarka üçün əlavə qorunma ilə əlaqələndirərək, “artan qeyri-müəyyənliyə” xüsusi diqqət yetirir.
Bu, ABŞ-ın təzyiqinə açıq işarədir. Belə çıxır ki, Trampın ticarət müharibələri Danimarkanı Avropa İttifaqı ilə daha sıx inteqrasiyaya doğru sövq edə bilər ki, bu da Vaşinqtonun maraqlarına ziddir.
Dollar və avro nağd: ruslar daha 2 il gözləməli olacaqlar Qeyd edək ki, Danimarka cəmiyyəti ənənəvi olaraq avroya keçid ideyasına şübhə ilə yanaşır.
2000-ci ildə danimarkalılar referendumda vahid valyutanın tətbiqinin əleyhinə səs vermişdilər. Lakin Milli Bank rəhbərinin bəyanatı elitada əhval-ruhiyyənin dəyişməsindən xəbər verə bilər. Ola bilsin ki, iqtisadi təzyiq və Avropa İttifaqında təsirini itirmək təhlükəsi Danimarkanı avro ilə bağlı mövqeyinə yenidən baxmağa məcbur edəcək.
Əli Babayev
