…Rusiya Maliyyə Nazirliyi 2026-cı il üçün büdcə layihəsini təqdim edib ki, bu da Ukraynadakı müharibəni maliyyələşdirməyə davam etmək üçün biznes və fiziki şəxslər üçün vergi artımını nəzərdə tutur.
SİA-nın məlumatına görə, bu barədə Daily Express yazır.
Sənədə əsasən, müdafiə xərcləri faktiki olaraq dəyişməz qalacaq və artan vergi daxilolmaları hesabına ödəniləcək. Əsas təklif ƏDV dərəcəsinin 20-dən 22 faizə qaldırılması idi. Qumar oyunlarına yeni 5 faiz vergi də nəzərdə tutulub.
Büdcə layihəsi hələ də Dövlət Duması tərəfindən təsdiqlənməlidir.
Rusiyanın maliyyə naziri bəyan edib ki, artan dövlət borcu inflyasiyanı sürətləndirdiyindən və əsas dərəcəsi artırdığı üçün borclanmanın artırılmasından daha çox vergilərin artırılmasına üstünlük verilir.
Vergi daxilolmaları Mərkəzi Banka investisiya və iqtisadi artım üçün vacib olan pul siyasətini yumşaltmağa imkan verir. Eyni zamanda, Maliyyə Nazirliyi qiymət artımlarının “mülayim və məhdud” olacağına, zəruri mallar – çörək, süd məhsulları, ət, dərman və uşaq məhsulları üzrə azaldılmış 10 faiz ƏDV dərəcəsinin qalacağını əmin edib.
Ekspertlər qeyd edirlər ki, vergi təşəbbüsləri effektiv şəkildə ƏDV-ni “müharibə vergisi”nə çevirir və ölkə iqtisadiyyatı aşağı artım vəziyyətinə doğru irəliləyir: dövlət imkanlarından artıq istehlak edir, hərbi sənaye kompleksi öz gücü ilə işləyir, vergilərin artması və tələbin azalması səbəbindən mülki istehsal əziyyət çəkir.
Rusiyanın 2026-cı il üçün ÜDM-in artım proqnozu əvvəlki təxminlərdən xeyli aşağı olan 0,5 faizə qədər yenidən işlənib. Yüksək vergilər təsdiq edir ki, Kreml müharibəni əhalinin hesabına uzunmüddətli maliyyələşdirməyə hazırlaşır.
Əli Babayev
