“Azərbaycanla Özbəkistan arasında istər ikitərəfli, istər Türk Dövlətləri Təşkilatı çərçivəsində, istərsə də İslam Əməkdaşlıq Təşkilatı və digər beynəlxalq təşkilatlar səviyyəsində çox ciddi və sürətli inkişaf müşahidə olunur. Əsasən, Şövkət Mirziyoyevin prezidentliyə gəlməsindən sonra bu proseslər yüksələn xətlə inkişaf edib”. Bu sözləri SİA-ya açıqlamasında siyasi şərhçi Şakir Ağayev deyib.
Siyasi şərhçi sözlərinə belə davam edir: “Nəzərə alsaq ki, 2004-cü ilin martında Azərbaycanla Özbəkistan Respublikası arasında strateji tərəfdaşlığın möhkəmləndirilməsi ilə bağlı bəyannamə imzalanıb və 2024-cü ilin 23 avqust tarixində ölkə Prezidenti İlham Əliyevin Özbəkistana səfəri çərçivəsində münasibətləri daha da möhkəmləndirən müqavilələr bağlanıb. Bundan əlavə, Türkmənistanda Azərbaycan, Türkmənistan və Özbəkistan arasında keçirilən üçtərəfli görüşlər də bu əməkdaşlığın əhəmiyyətini göstərir.
Qeyd edilməlidir ki, Özbəkistan, Azərbaycanla münasibətləri xüsusi önəmsəyən ilk müstəqil türk dövlətlərindən biridir. Məsələn, işğaldan azad edilmiş Füzuli şəhərində Mirzə Uluqbəyin adına 960 şagird yerlik məktəb inşa edərək investisiya yatırıb. Belə misallar çoxdur. Bütün bu proseslər həm humanitar, həm iqtisadi, həm də siyasi sahələrdə özünü göstərir. İstər iqtisadi, istər humanitar, istərsə də digər sahələrdəki inkişafların əsasında siyasi iradə dayanır. Bu, təkcə Azərbaycan üçün deyil, həm də Özbəkistan üçün faydalıdır.
Hər iki ölkə Türk Dövlətləri Təşkilatının fəal üzvüdür, eləcə də İslam Əməkdaşlıq Təşkilatı və digər beynəlxalq qurumlarda bir-birini daim dəstəkləyirlər. Məsələn, Şövkət Mirziyoyevin Azərbaycana son rəsmi səfəri çərçivəsində Ağşəhərdə Özbəkistan Parkının təməli qoyulur və bu parkda Özbəkistana məxsus sərgi pavilyonları da olacaq.
Bu əməkdaşlıq hər iki ölkənin iqtisadi və humanitar inkişafına, regional və beynəlxalq arenada mövqelərinin möhkəmlənməsinə xidmət edir. Azərbaycan Orta Asiyada, Özbəkistan isə Cənubi Qafqazda mövqeyini gücləndirir və bu da Türk Dövlətləri Təşkilatının birliyinə böyük töhfə verir.
Əminəm ki, bu proseslər gələcəkdə də artan xətlə inkişaf edəcək və Azərbaycan-Özbəkistan münasibətləri daha da dərinləşəcək”.
