“Prezident İlham Əliyevin Əl-Ərəbiya telekanalına verdiyi müsahibə Azərbaycanın həm regional, həm də qlobal siyasətdə artan rolunun göstəricisidir. Müsahibədə diqqət çəkən tezislərdən biri Azərbaycanın 2030-cu ilə qədər əlavə 8 milyard kubmetr təbii qaz hasil etməyi planlaşdırması ilə bağlı idi. Bu açıqlama, əslində, ölkənin enerji strategiyasının gələcək istiqamətlərini və beynəlxalq miqyasda artan əhəmiyyətini ortaya qoyur”. Bu sözləri SİA-ya açıqlamasında politoloq Polad Mehdiyev deyib.
Onun sözlərinə görə, Azərbaycan artıq uzun illərdir ki, enerji diplomatiyası sahəsində etibarlı tərəfdaş kimi tanınır. Bu yeni hədəf isə ölkənin yalnız mövcud bazarlarda – xüsusilə Avropada deyil, həm də Yaxın Şərq və digər regionlarda enerji təminatçısı kimi rolunu gücləndirəcək: “Enerji hasilatının artırılması Azərbaycanın iqtisadi sabitliyinə də müsbət təsir edəcək, çünki bu, dövlət gəlirlərinin artmasına, infrastruktur layihələrinin genişlənməsinə və sosial rifahın güclənməsinə xidmət edəcək. Digər tərəfdən, Prezidentin vurğuladığı kimi, Azərbaycan təkcə enerji ixrac edən ölkə olmaqla kifayətlənmir, həm də beynəlxalq enerji ticarətində aktiv oyunçuya çevrilir. Bu, ölkəmizin xarici siyasətinə əlavə imkanlar qazandırır, çünki enerji yalnız iqtisadi resurs deyil, həm də diplomatik alətdir. Azərbaycanın qaz ixracını artırması Avropanın enerji təhlükəsizliyinə mühüm töhfə verəcək, eyni zamanda ərəb ölkələri ilə əməkdaşlıq üçün yeni körpülər yaradacaq.
Bütün bunlar göstərir ki, Azərbaycanın enerji siyasəti sadəcə iqtisadi maraqlara əsaslanmır, həm də strateji xarici siyasət kursunun mühüm tərkib hissəsidir. Prezident İlham Əliyevin bu tezisi bir daha təsdiqləyir ki, Azərbaycan gələcəkdə enerji resurslarından səmərəli istifadə edərək həm regional sabitliyin, həm də qlobal enerji təhlükəsizliyinin təminatçılarından biri olacaq”.
