“Prezident İlham Əliyevin BMT Baş Assambleyasında etdiyi çıxış Azərbaycanın müharibədən sonrakı diplomatik mövqeyini və strateji prioritetlərini aydın şəkildə ortaya qoydu”. Bu barədə SİA-ya açıqlamasında politoloq Züriyə Qarayeva deyib.
.jpg)
Onun sözlərinə görə, burda diqqəti çəkən əsas məqam, Azərbaycanın yalnız regional sabitlik üçün deyil, həm də qlobal təhlükəsizlik və inkişaf üçün etibarlı tərəfdaş rolunda çıxış etməsidir: “Müharibədən sonra Ermənistanla münasibətlərin normallaşdırılması istiqamətində atılan addımlar, sülh müqaviləsinin paraflanması və Minsk qrupunun ləğvi regionda otuz ilə yaxın davam edən qeyri-müəyyənliyin aradan qalxdığını göstərir. Bu isə beynəlxalq ictimaiyyət üçün münaqişələrin sülh yolu ilə həllinə dair praktik model kimi əhəmiyyət daşıyır.
Regional təhlükəsizlik baxımından Azərbaycan həm geosiyasi, həm də geo-iqtisadi mövqeyini gücləndirərək yeni əməkdaşlıq formatlarını təşviq edir. Xüsusilə “Tramp Marşrutu” kimi layihələr Cənubi Qafqazı qlobal ticarət və nəqliyyat şəbəkələrinin mühüm həlqəsinə çevirə bilər. Bu təşəbbüslər Azərbaycan-Ermənistan münasibətlərinə müsbət təsir göstərməklə yanaşı, regiondakı digər aktorların qarşılıqlı inteqrasiyasına da töhfə verir və beynəlxalq sabitlik üçün əlavə zəmanət yaradır.
Enerji məsələlərində Azərbaycanın mövqeyi beynəlxalq ictimaiyyət üçün strateji xarakter daşıyır. Prezidentin çıxışında vurğulanan qaz ixracı, boru kəmərlərinin şaxələndirilməsi və yeni enerji bazarlarına inteqrasiya ölkənin Avropanın enerji təhlükəsizliyində əsas oyunçulardan birinə çevrildiyini təsdiqləyir. Bununla yanaşı, bərpa olunan enerji mənbələrinə investisiyalar Azərbaycanın yaşıl keçidə sadiqliyini nümayiş etdirir və qlobal iqlim gündəminə uyğunluğunu ortaya qoyur.
İqlim məsələlərinə dair təqdim olunan mövqelər Azərbaycanın beynəlxalq səviyyədə liderlik iddiasını daha da möhkəmləndirir. COP29-a ev sahibliyi və “Bakı Maliyyə Hədəfi”nin qəbul olunması inkişaf etməkdə olan ölkələrin səsini eşitdirməklə daha ədalətli iqlim maliyyələşdirməsi mexanizminə mühüm töhfə verdi. Bu, Azərbaycanın yalnız enerji istehsalçısı deyil, həm də qlobal iqlim proseslərinin formalaşdırıcısı rolunda çıxış etməsini təmin edir.
Nəticə etibarilə, Prezident İlham Əliyevin çıxışı Azərbaycanın beynəlxalq ictimaiyyət qarşısında təqdim etdiyi strateji vizyonun çoxşaxəli olduğunu göstərdi. Sülh təşəbbüsləri regionda dayanıqlılığa zəmin yaradır, enerji və iqlim siyasəti isə Azərbaycanın qlobal miqyasda məsuliyyətli və etibarlı tərəfdaş statusunu möhkəmləndirir. Bu baxımdan, çıxış həm region, həm də dünya üçün strateji əhəmiyyət daşıyan mesajlarla zəngin idi”.
