“İran-Azərbaycan münasibətlərinin davam etməsi üçün ortada müəyyən məsələlər var”. Bu sözləri SİA-ya açıqlamasında politoloq Tural İsmayılov deyib.
O bildirib ki, İran prezidenti Məsud Pezeşkianın Azərbaycan Prezidenti İlham Əliyevi təbrik etməsi, arada kommunikasiyanın olması, eyni zamanda İran prezidentinin müşaviri Mehdi Sənayenin Azərbaycana səfər etməsi burada yüksək səviyyəli görüşlər keçirməsi, həmçinin də kütləvi informasiya vasitələrində yazılandan aydın olur ki, İran prezidentinin Azərbaycana yaxın zamanlarda səfər etməsi gözlənilir: “Əlbəttə ki, İran-Azərbaycan münasibətlərində müsbət məqamları tutmaq üçün xeyli əsaslar formalaşmış olur. Ümumiyyətlə, nəzərə almaq lazımdır ki, İran -Azərbaycan münasibətlərində yaranan soyuqluq Azərbaycana görə baş verməmişdir. Artıq biz keçmişdən də bilirik ki, qarşılıqlı şəkildə İrandan Azərbaycana atılan müxtəlif dezinformasiya kampaniyalarına baxmayaraq Azərbaycan İranla münasibətlərdə həmişə dürüstlüyə və səmimiliyə qiymət verib. Bizim qonşu ölkələrə yanaşmağımız kifayət qədər obyektiv və eyni zamanda dövlət etikasına uyğun olmuşdur. Hər bir halda hesab edirəm ki, müəyyən problemli məqamların arxada qalması üçün artıq zəmin yetişib. Azərbaycanla İran münasibətlərində son zamanlar ölkə rəhbərləri arasında təmasların artması, İran rəsmilərinin Azərbaycana səfərinin gerçəkləşməsi iki ölkənin arasında münasibətlərdə müsbət tendensiyanı inkişaf etdirmək üçün vacib konturlar formalaşdırır”.
