Bu ilin ilk üç ayı ərzində “AzərEnerji” ASC-nin balansında olan istilik və su elektrik stansiyalarında 6 milyard 295 milyon kVt/saat elektrik enerjisi istehsal olunub. SİA “AzərEnerji”yə istinadən xəbər verir ki, bu ilin aprel-mart aylarında istehsal edilən enerjinin həcmi ötən ilin ilk üç ayında istehsal edilən enerjinin həcmi ilə demək olar eyni olsa da, səmərəlilik baxımından irəliləyişlər əldə edilib. Bu isə istilik enerjisinin azaldılması və əvəzində ekoloji cəhətdən təmiz və sərfəli su enerjisinin artması ilə bağlıdır.
Belə ki, ötən ilin üç ayı ərzində su elektrik stansiyalarında 420 milyon kVt/saat enerji istehsal edildiyi halda, 2025-ci ilin ilk üç ayında 645 milyon kVt/saat istehsal olunub. Bununla da 1,5 dəfə istilik enerjisi azaldılaraq su elektrik enerjisi ilə əvəzlənib. Su elektrik stansiyalarınının payına düşən istehsalın artması Qarabağ və Şərqi Zəngəzurda ardıcıllıqla tikilərək istismara verilən kiçik su elektrik stansiyaları ilə bağlıdır.
Bundan əlavə ötən ilin müvafiq dövrü ilə müqayisədə “AzərEnerji” tərəfindən 1 kVts elektrik enerjisi istehsalı üçün şərti yanacağın xüsusi sərfiyyatı 6,2 qram azaldılıb və bununla da 78,5 milyon kubmetr təbii qaza, o cümlədən maliyyə vəsaitinə qənaət edilib.
